သစ္စာတော်ခံ လေးကျိပ်ခုနှစ်ယောက်

ဂျပန်သမိုင်းကိုပြောရင် ဆာမူရိုင်းတွေရဲ့ သစ္စာစောင့်သိမှုနဲ့ သူရဲကောင်းဆန်တဲ့ စိတ်ဓာတ်တွေကို ချန်လှပ်ထားခဲ့လို့ မရပါဘူး။ ဒီဇာတ်လမ်းဟာ ဘူရှီဒိုရဲ့ ထင်ရှားကျော်ကြားတဲ့ ပုဂ္ဂိုလ် ၄၇ ဦးက သူတို့ရဲ့ တရားမျှတပြီးဖြောင့်မတ်တဲ့ စံပြပုဂ္ဂိုလ်အာဆာနိုရဲ့ သေဆုံးမှုမှာ အကျင့်ပျက်ခြစားတဲ့ အရှင်ကီရာကို သတ်ပစ်လိုက်တဲ့ ဇာတ်လမ်းပါ။ ဂျပန်သမိုင်းမှာ အကျော်ကြားဆုံးဖြစ်တဲ့ ရိုနင် ၄၇ ဦးရဲ့ လက်စားချေမှုဖြစ်စဉ်မို့ လူကြိုက်များတဲ့ ဒဏ္ဍာရီဇာတ်လမ်းတစ်ပုဒ်အဖြစ် ခုချိန်ထိတည်ရှိနေခဲ့ပြီး အဖြစ်မှန်အတွက်လဲ ရှုပ်ထွေးနေဆဲပါပဲ။ ကိုယ့်သခင်ကို သေဒဏ်ပေးလိုက်တဲ့အခါ ကျန်ရစ်ခဲ့တဲ့ ဆာမူရိုင်းတွေဟာ အရှင်သခင်မရှိတော့တဲ့ ရိုနင်တွေ ဖြစ်သွားကြပါတယ်။ ဒါပေမဲ့ သူတို့ဟာ အရှုံးပေးမသွားဘဲ သခင်ဖြစ်သူရဲ့ ဂုဏ်သိက္ခာကို ပြန်လည်ဆယ်တင်ဖို့နဲ့ လက်စားချေဖို့အတွက် နှစ်နဲ့ချီပြီး စနစ်တကျ လျှို့ဝှက်ကြံစည်ကြပုံတွေကို ဒီစာအုပ်ထဲမှာ ဖတ်ရှုရမှာပါ။

၁၈ ရာစုလောက်မှာ ဖြစ်ပျက်ခဲ့တဲ့ ဆာမူရိုင်းတွေရဲ့ လက်စားချေမှုကို ပြန်လည်ပြောပြထားသလို ဖြစ်တဲ့အတွက် အနည်းငယ်ရှုပ်ထွေးပြီး စိတ်ဝင်စားဖို့လဲကောင်းတဲ့ စာအုပ်တအုပ်ပါ။ တကယ့်လုပ်ကြံမှုနဲ့ ပတ်သက်တဲ့ သမိုင်းဆိုင်ရာ မမှန်ကန်မှုတွေကို ထောက်ပြတဲ့ ပညာရှင် Stephen Turnbull ရဲ့အမှာစာ၊ စာရေးသူ John Allyn ရဲ့အမှာစာတွေကို ထိပ်ဆုံးမှာ ဖော်ပြထားပါတယ်။

ဇာတ်လမ်းအကြောင်းရင်းကတော့ အာဆာနိုဟာ ရိုင်းစိုင်းတဲ့သူ၊ ကာမဂုဏ်ကိုလိုက်စားသူဖြစ်ပြီး ရိုနင်အဖြစ် မခန့်အပ်ခင်ကတည်းက အရက်သမားတစ်ယောက် ဖြစ်ခဲ့သူ။ ကီရာကတော့ အီဒိုခေတ်က သာမန်အရာရှိတစ်ယောက်ပါပဲ။ အာဆာနိုဆီကနေ လာဘ်ငွေအမြောက်အမြား တောင်းခံခဲ့ပြီး အာဆာနိုကမပေးတဲ့အတွက် ရန်ငြိုးဖွဲ့တယ်လို့သာ ဖော်ပြထားတယ်။

တွေ့ရှိလာရတဲ့ သမိုင်းအချက်အလက်တွေအရဆိုရင် ကီရာဟာ ဗီလိန်စစ်စစ် မဟုတ်ဘဲ စနစ်ဟောင်းရဲ့ သားကောင်တဦး ဖြစ်ခဲ့ရသူပါ။ ရိုနင် ၄၇ ဦးရဲ့ သစ္စာရှိမှုကို ပိုမိုပေါ်လွင်အောင်သာ ပြဇာတ်တွေထဲမှာ ကီရာ့ကို ပိုပြီးဆိုးသွမ်းတဲ့သူအဖြစ် ပုံကြီးချဲ့ ဖန်တီးခဲ့ကြပါတယ်။ ဒီ စာအုပ်ဟာ ဂျပန်ယဉ်ကျေးမှုမှာ ဒဏ္ဍာရီဆန်ဆန်ဖြစ်နေတဲ့ပုံပြင်တစ်ခုကို သမိုင်းကြောင်းအရ ဘယ်လောက်အထိ မှန်ကန်သလဲဆိုတာကို ဝေဖန်ပိုင်းခြားပြထားပါတယ်။ အချက်အလက်အမှားတွေကိုလဲ သမိုင်းအထောက်အထားတွေနဲ့ ပြန်လည်ပြင်ဆင်ပြသထားပါတယ်။ဒီလို ကြီးကျယ်ခမ်းနားတဲ့ သမိုင်းဝင်ဇာတ်လမ်းကို စာရေးဆရာ John Allyn က 47 Ronin အမည်နဲ့ ရေးသားခဲ့ပြီး ဆရာထင်ဇော်မှူးသင်က သစ္စာတော်ခံ လေးကျိပ် ခုနှစ်ယောက် ဆိုတဲ့ အမည်နဲ့ မြန်မာဘာသာပြန်ဆိုထားပါတယ်။ ဒီ စာအုပ်ဟာ သာမန်သမိုင်းနောက်ခံ ဇာတ်လမ်းတပုဒ်သက်သက် မဟုတ်ဘဲ လူ့သဘာဝ၊ တာဝန်သိစိတ်နဲ့ သစ္စာတရားဆိုတာ ဘာလဲဆိုတာကို နက်နက်ရှိုင်းရှိုင်း တွေးတောစရာပေးစွမ်းနိုင်တဲ့ စာအုပ်ကောင်းတအုပ် ဖြစ်ပါတယ်။ ဂျပန်ယဉ်ကျေးမှုနဲ့ သူတို့ရဲ့ တွေးခေါ်ပုံတွေကို စိတ်ဝင်စားတဲ့သူတွေအတွက်ရော၊ ရသမြောက်တဲ့ ဘာသာပြန်စာပေကို ခုံမင်သူတွေအတွက်ပါ လက်မလွှတ်သင့်တဲ့ စာအုပ်တစ်အုပ်လို့ ဆိုလိုက်ပါရစေ ...